ތަމްރީން ދަތުރެއްގައި ސަޢުދީ ޢަރަބިއްޔާއަށް ފުރުމަށް ހަމަޖެހިފައިވާ ވުޒާރާގެ އަންހެން މުވައްޒަފުންނާއި އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ބައްދަލުކުރައްވައިފިއެވެ.
މި ދަތުރުގައި ވުޒާރާގެ އެކި ސެކްޝަންތަކުގައި މަސައްކަތްކުރާ މުވައްޒަފުން ބައިވެރިވެލައްވާ ގޮތަށް ވަނީ ހަމަޖެހިފައެވެ. މި ބައްދަލުކުރެއްވުމުގައި ވަޒީރު ވަނީ ބައިވެރިންނަށް ކާމިޔާބު ދަތުރަކަށް އެދިލައްވާ، ދަތުރުގެ ބޭނުން ހެޔޮ ގޮތުގައި ހިއްޕެވުމަށް ނަސޭހަތްތެރިވެލައްވާފައެވެ.
މި ދަތުރަކީ މައްކާގެ ވަޤުފު މުއައްސަސާއިން އިންތިޒާމްކުރާ ދަތުރެކެވެ. މި ދަތުރުގައި މުވައްޒަފުން ޢުމްރާކުރުމުގެ އިތުރުން، ޢިލްމީ ދައުރާއަކާއި، މައްކާގެ ތާރީޚީ، ދީނީ އަދި އިޖުތިމާޢީ އެކި މުއައްސަސާތަކަށް ޒިޔާރަތް ކުރުމަށް ވަނީ ހަމަޖެހިފައެވެ. މި ދަތުރުގައި ވުޒާރާގެ 22 އަންހެން މުވައްޒަފުން ބައިވެރިވާނެއެވެ. މި ދަތުރުގެ ބައިވެރިން ފުރުމަށް ހަމަޖެހިފައިވަނީ ނޮވެމްބަރު މަހުގެ 8 ވަނަ ދުވަހުއެވެ.
